Тәбиғәттең иң гүзәл ерендә йәшәгән, үҙ тыуған илен иң ҡайнар хистәр менән һөйә белгән, үҙ теле-киләсәге өсөн һәр саҡ ҡалҡан булған  башҡорт халҡы яҡтылыҡ, изгелек хаҡында хыял иткән, мөғжизәгә ышанған. Башҡортостандың тиңһеҙ матурлығын, батырлығын, бөйөклөгөн сағылдырыусы башҡорт балы, «Урал батыр» эпосы, Шүлгәнташ мәмерйәһе, Янғантау, Салауат Юлаев һәйкәле, Красноусол минераль сығанаҡтарына юҡтан ғына  «Башҡортостандың ете мөғжизәһе» тигән статус бирелмәгәндер. Бөтә донъяға билдәле яһаған күркәм ҡомартҡыларыбыҙ рухиәтебеҙгә бөтмәҫ-төкәнмәҫ көс бирә, мөғжизә ише матурлыҡҡа, батырлыҡҡа әйҙәй, өмөт-ышаныс менән йәшәргә өйрәтә.